Post by haddi on Mar 14, 2018 21:07:12 GMT 5.5
Baat tab kee hai jab ham Lakhnau University me padhte the. Hamara naam shareefo me kam aur badmasho me zyada tha. University se pehle hamne boys school me padhai kee thi, isliye ladkiyon se milne ka zyada mauka nahi mila.
University me hamari jo reputation ban gayi, usme ladkiyo se dosti karna kamzor kee nishani mana jaata tha.
Nateeja ye hua ke 2 saal tak ham ladkiyo se aur ladkiya hamse door hee rahe. 3rd year me hamne choti-moti thekedaari bhi shuru kar dee. Hamare campus se laga hua ek Arts College tha. Us college me ek nayi building ke construction me kuch kaam hamne bhi le liya.
Sardiyo ke din the, ham aur hamare dost bahar lawn me baithe the. Ladkiyo ka ek group hamare bagal se guzra, ek ladkee ke haath me ek bade hee khubsurat see painting thi.
Mere muh se nikla “wah kya cheez hai !!”
Turant hee us ladki ne palat kedekha, aur jo mujhe dekha to sir jhuka ke chal dee. Mai bhi chakkar me pad gaya ke ye kya hua?
Ek dost ne kaha “bhai use laga ke tumne uske oopar comment kiya hai.”
Asal me un dino ham rehte bhi aise hee the, badi daadhi – bikhre baal, gale me 2-2 maala, shirt ke 3 button sardee me bhi khule hue, sleeves oopar chadhi hui to ye natural tha ke shareef ladkiya hamse door hee rahengi.
Agle din wo ladki fir nazar aayi to hamne use gaur se dekha, wo kisi shayar kee ghazal jaisi sundar to nahi thi par kisi bhajan jaisee saadi aur pavitra zarur thee. Ab hamare dil me jo feelings aayi wo pehle kabhi nahi aayee thee.
Dil ne kaha jao use sorry to bol do, dimag ne kaha ke uske paas bhi na jaana. Dil-Dimag kee isi kashmakash me 4 din beet gayi.
Ittefaq se 5ve din jab ham Arts college kee parking me apni bike se utare to dekha wo bhi waheee khadee thee aur kuch pareshan lag rahee thee, ab hamse na raha gaya to pooch baithe “koi problem hai kya?”
“Nahi”
“Are bata do, ham aapko khaa thodi na lenge”
Ye sun kar wo hamaree taraf aise palti jaise khaa hee jayegi, gusse me uske gaal aur bhi laal ho gaye the, usne bade kathorta se kaha “Dekhiye mister, mai abhi pareshan hun, mery scooty puncture hai aur aapko har waqt badtameezi ka nasha chadha rehta hai, mai in sab se door hee rehtee hun, bhagwan ke liye mujhe maaf karo”
Ab saale ko hamare sar pe to aasmaan hee toot pada, karne gaye the bhala aur ulta daant padne lagi. Hame turant charo taraf ghum ke dekha ke koi sun to nahi raha.
Bhagwan kee daya se koi nahi tha, hamne fir himmat jutai aur kaha “dekhiye ham aise waise nahi hain, ham to…. Meri baat puri bhi na hui k eek aur bouncer aaya “hame pata hai aap kaise hain, aap raah chalti ladkiyo ko dekh ke comments pass karte hain, aap gunde hain aur aapme tameez naam kee cheez nahi hai”
Ab hame samakh aaya ke kaise ghabrai hui billi sher ko bhi panja maartee hai !!
Ek akhree koshish kee “Are ham aapse yahi to kehna chahte hain ke us din hamne aapko kuch nahi kaha tha, ham to aapkee painting kee tareef kar rahe the, bhagwan kasam ham jaise bhi hain, ladkiyo ko kabhi galat nazar se nahi dekha “
Ab wo kuch confuse see ho gayi aur boli “job hi hai , abhi mai pareshan hun, plz mujhe aur pareshan na keejiye”
Itne me hame parking stand ka chotu dikha, hamne use awaz dee aur kaha jao madam ka tyre banwa lao.
Uskee bhi majbooree thi ke wo mana na kar sake. Hamaree sharafat thee ke ham use akela wahan chhod nahi sakte the. To dono kuch faasle pe khade rahe aur idhar udhar dekhte rahe.
Itne me hamara ek dost wahan se guzra aur hame dekh ke bola “Ka bhaiyya, tum bhi shuru ho gaye, Mubarak ho”
Ham apne aslee rang me aa gaye aur 2-4 gaaliyo ke baad kaha “bhaago saale nahi patak ke maarenge”
Wo to haste hue chala gaya par idhar madam ko fir mauka mila au boli
“Yahi hai aapkee shrafat?”
“are nahi , ham dost aapas me aise hee baat karte hain”
“Gaali de kar?”
“Ab kya Karen, bhagwaan ne hame zuban hee aisi dee hai”
“To fir university me padhne ka kya fayda hua?”
Ab is par hamare paas koi jawab na tha.
Utne me chotu scooty le kea a gaya, usne paise dene kee koshish kee par chotu ne kaha “bhaiya se paise nahi lete “
Wo ek baar fir muskurai aur kaha “waah kya sharafat hai”
Hamne kaha “are nahi aisa nahi hai’
“Mujhe der ho gayi hai, thnx for ur help” aur nikal gayi…..
Uske jaane ke baad dil me bada achcha achcha sa lagne laga, sham ko dost ikattha hue aur beer khuli to us dost ne poocha “kya bhaiyya, aaj bade khush ho, bhaujai mil gayi ka?”
“Abe nahi yaar, wo to bas us din ke liye baat clear karne gaye the”
“Achcha? Badi der tak akele me baat clear kar rahe the, ka ka clear kar diye?”
“Dekho yaar hamse bakchodi na karo”
“Are gussate kahe ho, ham to yahi keh rahe hain kee zindagi me pyar muhabbat bhi zaruri hai”
“Abe chutiya hee ho tum, hamse koi pyar karega kya?”
“Are kahe nahi karega? Tum koi lule-langde ho ka, bas thoda dadhee wadhee bana lo to sab theek hai”
“abe mare lappad ulat jaoge, ham daddhi kahe banaye be”
Yahi sab karne me raat ho gayi aur sab khaa-pee ke so gaye.
Subah uthne pe raat kee baaten yaad aa gayi to laga kee shayad hame bhi pray hone laga hai. Magar fir khayal aaya kee nahi hame ye sab nahi karna. Aur ham taiyar hokar campus nikal gaye aur dopahar ko Arts college pahuche , kaam dekhkar wapas lawn me baith gaye. Tabhi wo ladkee fir dikhai dee, aisa laga ke wo hamare paas aana chahtee hai par hamaree mandali dekh ke ghabra rahi hai.
Ham to is pyar wyar me anadi the, par hamare dost samajhdaar nikle, ek ne kaha “jao naam to pooch lo”
Hamne bhi socha naam poochne me kya harz hai, uthe aur teer kee tarah
pahuch gaye uske paas. “Aap kuch kehna chahti hain?”
“Haan, kal theek se apse baat nahi kee uske liye sorry aur aapne jo hamari madad kee uske liye thanks”
Jise kabhi kisi ne thanks na kaha ho, use ek ladki thanks kahe to uska kya haal hoga ye bataya nahi jaa sakta, ham to ekdam pighal hee gaye.
Muh se khud ba khud lafz nikalne lage
“Ab aap saamne hain to kuch bhi nahi hai yaad,
warna hame kuch aapse kehna zarur tha !!”
Ab uskee hairaanee dekhne layak thee, mano keh rahee ho university ka gunda aur shero-shayari ?!
Usne bas itna hee kaha, “aapse sher kee umeed nahi thi, par achcha laga, shayad aapme sach me sharafat hai. “
“Apko ham kaise yakeen dilayen ke ham wakai shareef hain”
“Apki dadhi aur roller up sleeves dekh ke to koi bhi na manega, agar aapko yakeen dilana hee hai to dadhi saaf kara deejiye aur kapde zara dang se
pehna keejiye, mai maan loongi”
Ab to hamari halat aur bhi kharab, karo to museebat, na karo to museebat !!
Maine kaha “Mera naam RAGHU hai”
“Aap to pure arts college me mashhoor hain”
“Aapka naam kya hai ?”
“SUHANA”
Wah wah, kya suhana naam hai !!
“Bas yahi kami hai aapme, taareef bhi karte ho to lagta hai gaali de rahe ho,
Achcha mai chalti hun, class ka time ho gaya hai”
Us din se hamne arts college jaana hee band kar diya, kaam bhi khatam ho chuka tha aur darr tha ke usne ab jo dadhee dekh lee to zarur hee gaali degi.
10 din beet gaye aur hamare andar ek ajeeb see bechaini hone lagi. Finally ye decide kiya ke Arts college kee parking ke saamne waali chai kee dukan me baith ke use ek baar door se he dekh liya jaye.
Chutti se pehle hee ham morche pe jaa date aur ciggerate sulgai hee thi ke saamne se madam aate hue nazar aayi. Ab jab aamna – saamna ho hee gaya tha to bhaagne kee gunjaish kahan?
Hamne kaha – Namaskar, usne kaha- hello
Ham fir sharminda hue ke yaar ladkiyo se to hi-hello hee karna chahiye.
"Achca to aap namaste karne se khud ko shareef saabit karna chahte hain!”
“Nahi-nahi, bas hame ladkiyo se baat karne kee aadat nahi hai na”
“Theek hai, pehle ladkiyo kee baat to maaniye, khud ko appearance me shareef banaiye”
“kya aap hamare saath chai piyengi?”
“ thanx par mujhe derr ho rahee hai”
Aur wo chali gayi
Ab to ham bilkul hee kaboo se bahar ho gaye, agle din subah hee dadhee saaf karai , achche se tayaar hue aur Archies Gallery pahuche, ek khubsurat sa gift aur ek chota sa frndship card liya, card pe likha
“Dil de diya hai unko, dekhe wo kya karenge ,
Dil ko rakhenge dil me, Ya dil se juda karenge !!”
Is baar ham chutti se 1 ghanta pehle hee ja dhamke, chai kee pyali se hee man hee baat karne kee practice karte rahe.
Fianally wo nazar aayi to ham uskee scooty ke paas ja pahuche, hamne kaha
“Hello”
Wo ekdam hee shocked see meri taraf dekhne lagee aur boli “maine to aapko pehchana hee nahi”
“Apne hee to kaha tha, dadhi saaf kara do”
“Oh my god, that’s so nice of u, maine sapne me bhi nahi socha tha aap use itna seriously lenge”
Maine dil me kaha, saale sab aashiq chutiye hote hain, aur aaj se mera bhi naam us list me likh do”
Aur tabhi maine realize kiya ke hame wakai pyar ho gaya hai !!
“Chai peene chale?”
Usne sharmate hue kaha, “aapke is dhaabe pe?”
“Nahi, Royal Café chalet hain”
“Okay, aap chal ke mera wait keejiye, mai 5 min baad aaungi”
Ham wahan mile aur tea-sandwich ke saath baate kee, jab wo jaane lagee to maine use wo gift aur card diya, wo fir se hairaan reh gayi aur boli “Sorry, mai ye nahi le sakti, but we can be frnds.”
maine kaha "frndship me gifts ko mana nahi karte”
Wo for muskarai aur thanx keh kar gift apne bag me rakh liya.
“Fir kab milogi?”
“Jab aap chahe, college me aa jaiye, I have to go now, bye”
Agle din uske college jaane kee meri himmat nahi hui, kya pata wo card padh ke naraz na ho gayi ho !!
Agle 7 din tak meree yahi haalat rahi, Roz subah taiyaar hota aur fir ghabra kar ruk jaata aur fir beer baaji chalu ho jaati.
Aakhir doston ke chadhaane par maine bhi socha kee mil to lun ek baar, aar ya paar ka pata to chal jaye.
Wo din tha bhi bada achcha march ka maheena tha, hawa me mahek thee, charo taraf holi ke taiyaree chal rahee the, festive atmosphere tha, ham bhi ban than ke chal diye apnee kismet ka faisla sunne ke liye. Raaste me ek kameene ne hamare oopar rang bhara gubbara de maara, uski ma, bahen, beti sabko pukarne ke baad hame dhyan aaya kee shirt kharab ho gayi hai.
Ham fir wapas hostel ke liye chal diye, shirat change kee, bal thekk kiye aur is baar to hamne bike ko plane bana diya aur toofaan kee tarah, uske college pahuch gaye.
Hame dekhte hee wo stand ka chotu dauda hamaree taraf “are bhaiyya kahan the aap, wo didi to roz yahan chutti ke baad bhi ruktee thee aur shayad aapko hee dhoondhti thi, aaj bhi yaheen thi abhi 10 min pehle hee gayi hain”
Hamne fir us gubbare waale kee ma-bahen ko yaad kiya tabhi chotu ne apne jeb se ek envelope nikala aur hame diya “wohi scooty waali didi ne diya hai, kaha tha kee aap kabhi aayen to aapo de dun”
Ab to aisa laga ke hamare dil kee dhadkan holi ke nagadon se bhi tez ho gayi hai, kaan aise garam hue jaise hame holika me daal diya ho, kaanpte hatho se hamne wo envelope liya aur chotu se kaha jaa ek ciggerette le aa.
Cigg jalane ke baad kuch shaanti aayi to bhi lifafa kholne kiee himmat na hui. Aakhir kuch der idhr-udhar bhatakne ke baad ham Gomti river ke kinare pahuche aur wahan baith kar lifafa khola. Jaise jaise shabd saamne aate rahe, hamaree saanse ukhadne lagee, aankhe bheeg gayi aur jism thanda padne laga.
Usne likha tha :
Dear RAGHU
Maine kabhi socha bhi na tha ke oopar se itna sakht dikhne waale is shaks me andar itna komal dil bhi ho sakta hai. Aapse baate karna mujhe bahot achcha laga, aapme wo saree khubiya hain jo kisi bhi achche insaan me ho saktee hain, aapke card ke jawab me mai aapse bas itna hee keh saktee hun ki –
“Jab bike na the, koi poochta na tha
Tumne mujhe khareed ke, anmol kar diya”
Magar mere bhi kuch majbooriyan hain, mai ek aise parivaar se hun , jahan ladkiyon ka ghar se nikalna bhee mana hai, ye mere ghar waalo ka mujh pe bharosa hai jo unhone mere painting ke shauk ko aage badhane kee ijazat dee hai, agar mai unhe bata kea apse milu, to ye mumkin na hoga, aur bina bataye milna unke bharose ko todna hai.
Agar aapne mujhe wakai pasand kiya hai to mere ye pareshanee samajh kar mujhe maaf karenge. Meree bhagwaan se yahi kaamna hai kee aapko jeevan me saaree khushiyan mile.
Maine kai din tak tak aapka intezar kiya, par shayad aapke naa aane ka kaaran mai samajhti hun, aaj mai Delhi jaa rahee hun, fir shayad milna na ho sake, isliye aakhir me itna hee kahungi
“Wo afsaana jise anjaam tak laana na ho mumkin
Use ek khoobsurat mod dekar chhodna achcha “
Bas yahee afsos rahega kee apse mil kar ye sab na keh saki.
Aapkee dost
SUHANA
