Uufff!!Yeh Muhabbat

Uuuffff..!! Yeh MuhabbaT
Maria main ne faisla kar lia hai. Go
keh yeh mere liye buhat bara faisla
hai lakin maria mere dil main jis be-
chaini ko sakoon, tumhare mazhab ke
mutalaye se milta hai main us pakezah
mazhab main apni zindagi dhalna
chahti hon. Anum ki ankhain
bhaghechay main door lage khoobsurat
pholon per then aur wo apni saheli
maria se guftago kar rahi thi...
Maria ke chehre per khushi ke lamhat
dedni thay. Maria, anum ki baton ka
matlb ba khobi samjh rahi thi. Anum ao
sab se pehle is faisle ki khabar meri
mama ko detay hain... Anum ki batoon
se maria ka zehan aik hi lamhay main
pechle 2 saloon ki yadoon main ghote
khanay laga.
Anum aur maria class fellow then.
Anum ki university main admission ke
bad pehli mulaqat maria se hoi thi.
Maria ki shakhsiyat ne anum ko pehli
nazar main hi buhat mutasir kia tha.
Baqi larkiyaan shayed apne chote
shehar ko chortay waqt apni tahzeeb
aur aqdar bhi sath chor ayen then aur
yahan university main "jadeed"
zamanay ki jiddat main apna hissa
dalna farz-e-ain samjh bethi then.
Lakin maria ne apni tahzeeb se
baghawat nahi ki thi. Maria ne apne
poray jism ko bari khobsurti se dhanp
rakha tha aur us ka chehra scraf main
buhat pur-noor dikh raha tha. Wo pori
class main alag dikh rahi thi.
Hi, I am anum
Aslam-u-aliykum, I am maria.
This is our first day in university, kia
main apke sath baith sakti hon? Anum
ne maria ke salam ka jawab diye
beghair apni bat shuru kar di.
Obviously you can sit here, this is not
my own property, maria ne chehre per
muskaraht sajaty howe jawab dia.
Pehli mulaqat main ye rasmi batain
waqt ke sath sath gehri dosti main
badal gain. Dono saheliyoon ki gehri
dosti main un ka family background bhi
aaray na aya. Anum ki paidaish UK main
hoi. Jab us ke walid ki posting UK se
Pakistan embacy main hoi tu anum bhi
apne mama papa ke sath Pakistan main
a gai.
Jab keh maria aik middle class se thi.
University bus main anay wali maria
aur luxrai car main anay wali anum
main ye dosti bila shubha kesi lalch ke
beghair thi. Class main baqi larkiyaan
khud anum ki taraf jhukti then shayed
us ki rozana anay wali lambi si car ko
daikh kar sab ke munh main pani a
jata tha.
Anum jahan apne status se waqif thi
wahen usko kesi cheez ki talaash thi.
Wo cheez usko maria ke wajood main
nazar ati thi. Aik pori sajh dajh aur
nazo naam main pali barhi anum khud
main jis cheez ki kami mehsos karti
thi wohi cheez usko aik sada si aur
apni tahzeeb main dhali hoi maria main
nazar ati thi. Anum sakoon ki mutlashi
thi ya kesi anjaani be-chaini ka shikar
lakin us ko maria ki ankhoon main
hamesha sakoon hi dikha tha.
Maria aur anum ki dosti ko aik saal ho
chuka tha. Is aik saal main anum ne
maria se apne dil ka hal nahi sunaya
tha. Wo ziyada se ziyada waqt maria
ke sath bitati. Combine study ka
bahana kar ke us ne aik flat bhi rent
per lia tha ke wo aur maria ziyada
waqt sath guzar saken. Wo maria ko
btaye beghair us raz ko hasil karna
chah rahi jis ki wajha se maria ke
chehre per har waqt sakoon ki kafiyat
tari hai. Music maria nahi sunti, kesi
club main ye nahi jati, har waqt khud
ko hijab main chuapye "tang nazri" ka
muzahra bhi karti hai, zamany ki jidat
se ye waqif nahi, jab keh mere pass
paisoon ki kami nahi, jis cheez ko dil
chahy wo hasil karna mere liye mushkil
nahi hai, dosti ka dawa karne waly
larky bhi hain aur dheroon larkiyaan
bhi mere ird gird rehna chahti hain tab
bhi main kiyon us sakoon se mahroom
hon jis ke nashay main maria har waqt
masror rehti hai.
Maria main tum se kuch pochna chahti
hon. Anum ne khud se larny ka faisla
badla aur apni be-chaini ka sbab akhir
maria se daryaft karna chaha. Aaj
semester ka akhiri din tha aur phir
anum ko apne parents ke sath UK jana
tha kuch din ke liye.
Kia yeh pochna chah rahi ho ke is
semester main top kon karay ga? Tu
definetly tumhari saheli hi har bar ki
tarah toper ho gi. Maria ne apne
qadray fakhar se kaha.
Nahi yaar kuch aur hai pochne ko aur
yaar please be serious. Anum ne maria
se kaha.
Ok I am serious now, han bolo kia
kehna chah rahi ho. Maria anum ki bat
se such main serious ho gai.
Maria shuru din se main daikh rahi hon
tum kitni khush, aur pur-sakoon ho,
tumhari zindagi main kitna itmenan
hai, maria tum se dosti bhi is liye ki ke
tum alag dikhi mujhe sab se, maria
mujhe tum jaisa sakoon hasil nahi,
please mujhe meri be-chaini aur be-
sakooni se nikalo, mujhe wo raaz btao
jis ki wajha se tum... Anum is se agay
na bol saki aur maria ki ankhoon main
dekhni lagi.
Lo itni si bat aur meri jaan itni
preshan kiyon hai. Aur itni dair kiyon
laga di ye sawal pochne main? Maria ne
anum ko mukhatib kia. "Dekho anum
hamare andar aik dil hai. Ye dil asal
main hamare Rab ki ibadat ke liye bna
hai. Jab hum is dil ko kahen aur khush
rakhna chahty hain tu ye be-chain ho
jata hai. Is dil ki be-chaini hi hamare
poray wajood ki be-chaini ka sbab hai.
Is dil ko us rah per chalao jis ka
mutalbah hamare khaliq ne hum se kia
hai tu daikhna tum kitna sakoon hasil
kar pao gi."
Maria main kia karon jis se mere dil ko
itmenan hasil ho. Tumhari batain mere
pallay nahi par rahen. Anum ne maria
se pocha.
Anum abhi tum ne jana bhi hai aur kal
se tum UK bhi ja rahi ho. Meri piyari
raj dulari tum se kehna buhat kuch
hai, lakin buhat kuch soch kar keh bhi
nahi pai aaj tak tum se. Filhal tum
mere kehne per jab farigh waqt milay
tu ye book read karna. Maria ne bat
karte howe apne bag se aik book nikal
kar anum ko di.
"Peer-e-Kamil"
Acha maria main chalti hon aur tum se
rabta rahay ga. Apna khiyal rakhna.
Anum ne book ko aik nazar dekha aur
apne bag main dal kar uthty howe
kaha...
------------------------------
------------------
Mama wo meri friend anum hai na. Aaj
us ne buhat hi ajeeb sa question kia.
Maria apni mama se university se wapsi
per batain karte howe boli.
Kaisa question? Mama ne bhi tajusus
se pocha.
Mama wo keh rahi thi us ki life main
wo sab kuch ha jis ki sabhi log
khawaish karte hain lakin aik nahi hai
to dil main sakoon nahi hai. Aik ajeeb
si be-chaini hai. Us ne mujh se dosti
bhi is sakoon ki talaash main ki hai.
Maria ne apni mama ko sari bat btai.
Baiti mujhe lagta hai Khuda ne us ko
sahi rasta dikhanay ka soch lia hai.
Tum ne btaya tha wo muslim nahi ha
shayed. Us ke dil main be-chaini, sahi
rasta ki taraf pehle qadam hai. Tum
ne qadam ba qadam us ka sath dena
hai. Qudrat ne shayed tumhare zirye
aik batki hoi hawa ki baiti ho apni
bandi bnana hai.
------------------------------
-------------------
Maria tumhara matlb hai meri aaj tak
ki sari zindagi aik anjaan rastay per
aik batki hoi manzil jaisi thi? Anum ne
rohansi ho kar maria se pocha.
New semester shuru ho chuka tha aur
anum UK main kuch din rehne ke bad
wapis a kar university join kar li thi.
Farigh oqat main anum ne maria ki di
hoi book ko read kia tu us aise laga
jaise us book main "imama" name ki
larki wo khud ho aur kaise us ko
hadeyat mili. Kis tarah us ne "Deen-e-
islam" ko samjha aur parkha. Aur apni
dil ki zindagi guzarne ke liye kia kia
qurbaniyan deni paren...
Anum aur maria flat main bethi then.
December ki sakhat sardi main flat
main heater ke samne dono baithen
then. anum kuch ghamzada lag rahi
thi.
Daikho anum, tum ne mujh se apni
preshani share ki aur tum mujh jaisa
sakoon hasil karna chahti ho. Is liye
jo mujhe apni saheli ke liye theek
lagay ga main wohi kahon gi. Agar
meri bat buri lagay tu advance main
mafi talab karti hon. Maria ne bat
karne ke liye tmheed bandhi.
Maria main janti hon tum kia kehna
chahti ho. Maine tumhari di hoi book
ko read karne ke bad Tumharay mazhab
ka mutalia kia hai aur mujh per buhat
si nayi batain khuli hain. Bs yun samjh
lo jin wajohat ki wajha se itnay
saloon ki tareeki thi mere andar, wo
chatt rahi hai. Main is natijay per
pohanchi hon keh mera mazhab kamil
nahi ya us ki bunyadain khokhali hai.
Mujhe kuch aur din chahye kesi atal
faisle per pohanchne ke liye...
------------------------------
---------------------
Mama aaj dekho kon aya hai mere
sath. Maria ne ghar atay hi mama ko
awaz di. Anum maria ke peche peche
ghar main dakhil hoi.
Ao baiti a jao. Maria ki mama ne anum
ka matha chomty howe kaha.
Aunty main apka mazhab ikhtiyar
karna chahti hon. Mujhe ap meri be-
chainiyoon se nikal kar sahi rasta per
le ayen. Is faisle main meri apni raza
mandi shamil hai.
Baiti dekho mujhe buhat khushi hoi
tumhare is faisle se. Lakin aik bat
zehan nasheen kar lena. Sabit qadmi
hi tumhari kamyabi ho gi tmhari manzil
tak. Tum ko ab unki taraf se
preshaniyaan ayen gi jin se tum ko
buhat piyar hai. Kia sabit qadm reh
pao gi?
Haan aunty mera faisla atal hai.
Mujhe is faisle main hi rahat hai.
Anum ke andaz main bala ki pukhtagi
thi.
--------
Maria tum samjh nahi sakti. Aaj agar
main wapis ghar gai tu kabhi us
chungal se nikal nahi paon gi. Mere
baba ko mere mazhab badlne ke faisle
ka pata lag gya hai. Mere baba ke liye
mujh se aziz unka status ha. Apna
status bachany ke liye wo meri
zabardasti shadi karwa rahen hain.
Agar main wapis gai tu... Anum phot
phot kar ronay lagi...
Maria ne anum ki halat daikhi tu apna
mobile utha kar mama ko call ki. Kuch
batain karne ke bad maria ne anum se
pocha. Anum tumko phir mere sath
chalna hoga. Cholo phir yahan se aur
bhool jao apne mazi ko...
----------------------
Qabool hai
Qabool hai
Qabool hai
In teen fiqroon ke sath anum Rehaan
ki biwi ban gai. Anum ne apne parents,
aish-o-ishrat ki zindagi ko chor dia
kesi aur lalch main nahi balkeh apne
apnaye howe naye mazhab ki khatir.
Rehaan ko wo nahi janti thi. Bas itna
janti thi ke uski friend ne apne cousin
jiski mang main wo khud thi, jis se aik
sal bad uski shadi honi thi, us Rehaan
se apni saheli ki shadi karwa di.
Rehaan ke baba fout ho chukay thy,
rehaan ki mama ne maria ke israr per
rehaan ka rishta maria se tor kar
anum se karwa dia. Rehaan ki mama
maria per aafreen thi ke kis tarah
maria ne apne bachpan ke piyar ko
anum ke sath zindagi ki dor main bandh
dia...
------------------------------
-------------------
Main ne koi kachi goliyaan nahi khaili
hoin. Tum kia samjhti ho tum inkar
karo gi hum tumhari bat maan jayen
gen?
Mujhe maloom hai tum ne meri baiti ko
warghalaya aur us ko ghar chorne per
majbor kia. You Muslims are bloody
shit...
Is ke sath hi parvaiz ne thook phaink
dia maria ke chehre per. Maria ki
ankhoon main anso thay. Anum ke baba
ko jab sari haqiqat maloom pari tu
unhoon ne maria ko university se
uthwa lia aur ab tashadud ka har
harba istamal kar ke wo apni baiti ka
pata maloom kar rahay thy. Lakin
maria bhi apni saheli se kia wada nibha
rahi thi.
Iski zuban kat do aur sari umar ke liye
iski bolne ki taqat khatam kar do agar
ye apni zuban nahi kholti to....
Maria ne apni saheli se kia wada pora
kia aur ab wo hosh main a chuki thi.
Hosh main atay hi usko yaad aya kis
takleef ke bais wo hosh kho gai thi.
Maria ab janti thi ab wo sari umar bol
nahi paye gi. Maria ki ankhoon se anso
nikal gaye. Chehre ki muskarahat bta
rahi thi ye anso kesi nidamat ke nahi
hain...
Anum ki rehan se shadi ko aik sal ho
chuka tha. Anum aik baiti ki maa ban
chuki thi. Apni zindagi main ab wo
buhat pur sakoon thi. Rehaan bhi uski
buhat qadar kartay thay. Shayed Khuda
ne itni bari qurani ka silla Rehaan ke
bepanah piyar ki shakal main dia. Anum
is pursakoon zindagi ko hamesha maria
ka dia howa jiwan hi qarar deti thi.
Maria ke sath jo beti uski khabar bhi
anum ko thi. Lakin anum siwaye malal
zahir karne ke aur kia kar sakti thi...
------------------------------
-----------------
Is na-paak olad ne meri izzat khak
main mila di hai. Main zinda dargor
kar don ga na-paak olad ko. Maria ke
baba gussay main onchi awaz main
boltay howe zor se maria ke kamre ka
darwaza baja rahay thay. Maria ki
shor se ankh khul gai. Baba ki awaz
sun kar harbara kar bed se uthi, sar
per dopatta orha aur Kamre ka
darwaza khol dia. Kamray ka darwaza
khultay hi baba ka aik zordar thappar
maria ke chehray per para. Thappar
itna zor dar tha ke maria peche hoti
hoi bed ki nukar se ja takrai. Maria
hakka bakka thi achank is aftad se.
Baba ki guriya ke nazuk chehre per
baba ka zor dar thappar. Ya khuda ye
baba ko kia ho gya. Maria abhi sanbhali
hi nahi thi ke uski peth per koi zor dar
cheez takrai jaise koi lakri ki mazbot
chari ho. Baba ke hath main lakri ki
chari thi jo ke wo maria ki peth main
barsane lagay. Maria machli be-aab ki
tarah tarpne lagi.
Kia ho gya ha? Kiyon ap baiti ko
janwaroon ki tarah mar rahay hain?
Maria ki mama ne boltay howe maria ke
baba ke hath ko pkr kar rokna chaha.
Aik zordar dakka parne per maria ki
mama dor ja giri.
Is se pocho ye kis ke sath apna munh
kala karti hai. Ye dekho is ki
taswereen. Maria ke baba ne
taswereen maria ki mama ki taraf
uchal den.
Kuch barhana taswereen thi maria ki
kesi larkay ke sath. Taswereen daikh
kar mama ke paon talay bhi zameen
khisk gai.
Maria ki ankhain bhi khoof aur hairat
se phail gain. Maria apni safai main
zuban kholna chahti thi lakin "be-
zubani" aaray a gai lakin baba ki ladli
baiti ki kamar per chalti hoi lakri ki
lathi shayed abhi rukne wali nahi thi.
Maa baiti ki zakhmi kamar per marham
laga rahi thi aur ankhoon main anso
bahay ja rahay thay. Maria bol nahi
sakti thi lakin ankhoon se mama ko
bta rahi thi wo aisi nahi hai. Ye sab
ghalat howa hai lakin be-sood...
Ye aaj 4th day tha mama ko baiti ki
marham patti kartay howe. Zakham
bhar rahay thay lakin baiti ka dil baba
ki be-rukhi se mazeed zakhmi hota ja
raha tha.
Ab zakham bhar rahay hain. Jald hi
theek ho jain ge. Mama ne baiti ko
tassli daitay howe kaha. Maria be-
sudh lati rahi.
Tumharay baba nay tumhara rishta teh
kar dia hai. Mama ke alfaz bomb ban
kar giray maria ke zakhmi dil per. Us
ki pehli biwi fout ho chuki hai. 3
bachay hain aur umar koi ziyada nahi
bs 37 ka hai. Mama ki awaz main dard
tha.
Maria ab janti ki us ki qismat main kia
likha ja rha hai. Baiti wo tumharay
baba hain. Gussay main hain jald hi
normal ho jain ge, tum naraz na ho un
say. Mama ne rohansi ho kar kaha.
------------------------------
--------------------
Aunty Main ap se sakhat naraz hon.
Itni qiyamat toot gai meri muhsana
per ap ne mujhe btana bhi ghawara
nahi kia. Ye bhala nazuk baitiyoon ko
aise mara pita jata hai. Mard itnay
zalim bhi ho saktay hain bhala? Pehle
mere baba ne zulam ki intaha ki us per
phir us ke apnay baba ne. Babul ka saya
tak cheen lia us ke sar se. Bhala ye
koi jor ka rishta kia hai apne? Anum
ko jaise sab khabar milli tu wo fori
apni saheli ke pas chali ai aur abhi
maria ki mama se gila shikwa ho raha
tha.
Baiti us ke sath kon shadi karay ga.
Wo bol nahi... Bas bas aik lafz nahi
sun sakti main aur... Na hi main uski
ye shadi honay don gi. Anum ne maria
ki mama ki bat kat di.
Kia matlb tumhari is bat ka? Maria ki
mama ne be-yaqeeni ki kafiyat se
pocha.
Usnay jo kuch meray liye kia hai main
us ka sath kaise chor sakti hon? Maria
meri dost thi, hai aur rahay gi, tareek
andheroon main nahi phainknay don gi.
Aunty kia ap chahti hain apki baiti ka
aisa be-jor rishta ho? Kia us ke koi
sohanay sapnay nahi? Kia unko pora
karna apka farz hai ya nahi? Anum,
aunty ke samnay bathi un se aise sawal
poch rahi thi jin ka jawab tu tha lakin
aunty khud lachar then.
Aunty main ne apko apni maa se ziyada
chaha hai. Mujhe umeed hai ap meri
bat nahi talen gen. Anum ne aunty ke
dil ko mom kar lia in batoon se.
Kia kehna chah rahi ho tum? Maria ki
mama ne pocha.
Apki call ke bad main ne Rehaan ko qail
kia hai. Main maria ko apnay ghar ka
hissa bna lon gi Rehaan se shadi karwa
kar. Anum ne kaha
Tum pagal ho kia? Koi larki aisi bat
nahi kar sakti ya phir ye jazbati faisla
hai tumhara. Maria ki mama ne be-
yaqeeni se kaha.
Nahi aunty ye jazbati faisla nahi ye
meri muhabbat hai maria ke liye. Aisi
muhabbat jis ko koi aur shayed na
samjh paye. Wo meray sath hamesha
khush rahi hai aur main ab uske sath
khush rehna chahti hon.
------------------------------
---------------------
Nahi ray pagli ye wala lehnga dekho.
Ye lal rang ka lehnga,tum per buhat
suit karay ga. Is main dulhan bani meri
dost Rehaan ke liye qabool hai, qabool
hai kahay gi tu buhat sundar lagay gi.
Suchiiiii
Maria ke chehre per muskarahat phail
gai aur mashraqi kanwari larki ki
sharmahat se chehre ka rang lal ho
gya.
Maria apni dost ki bat per sharma rahi
thi, aaj wo us ki dost hai lakin kal wo
anum ki sotan ban jaye gi. Aisi
sotaneen jin main muhabbat hi
muhabbat ho.
Mohabbat cheez hi aisi hai
Kabhi hoti hai apno se
Kabhi hoti hai sapnon se
kabhi anjaan raahon se
kabhi gumnaam naamon se
Mohabbat cheez hi aisi hai
kabhi hoti hai phoolon se
kabhi bachpan ke jhoolon se
Kabhi be-ikhtiyaari mai
Kabhi pakke usoolon se
Mohabbat bas mohabbat hai
Mohabbat ik sadaqat hai
Mohabbat cheez hi aisi hai
Dukhon mai roll deti hai
Dard Anmol Deti hai
Mohabbat cheez hi aisi hai...
------------------------------
---------------------
Qabool hai
Qabool hai
Qabool hai
Maria ka chehra sharam ki surkhi se
lal tha aur anum ke chehre per
muhabbat bhari muskarat...
Uuuffff Yeh MuhaBBaT...