|
Post by jmianshul on Mar 26, 2018 15:00:01 GMT 5.5
Update 1
Wo khoobsurat aurat thi. Umar 24 saal se jyada nahi thi, agar mang me surkh rang ka sindoor na bhara hota to use koi bhi vivahit istri nahi kah sakta tha. Abhi abhi wo apne kamre me dakhil hui thi. Gulabi rang ki saadi utaarkar usne gown pahna, muh dhoya, phir ek peg whisky ka lene ke baad batti bujhakar night bulb jalaya aur palag par letkar aakhe band kar li.
Kuch minute hi beete the ki callbell baj uthi. Usne uthkar jaise hi darwaza khola, do nakabposh us par jhapte. Wo cheekh bhi nahi saki, kyoki ek nakabposh ne use daboch liya aur dusre ne uske muh me rumal thoos diya, aur hath paav bandhne ke baad ek nakabposh ne darwaza band kar diya.
Wo aurat bhaybheet nigaho se dono ko dekh rahi thi. Phir ek nakabposh uske us taraf chati par khada ho gaya jis taraf dil hota hai. Us masoom aurat ke dil par jab dabav pada to wo dard se chatpatai. Dusre nakabposh ne uski naak daba di. Is dohri mar se wo buri tarah chatpatai, lekin puri tarah se swasth hone ke karan uske praan asani se nahi nikal rahe the, lekin thodi der baad uska badan deela pad gaya.
Uske seene par chada vkati uske upar se neeche utar gaya, khuli palko ko band karke rumal muh se nikala, hoto ko band kiya aur phir nabz dekhne ke baad bola, “ Mar gayi.”
“To khisak lo, koi aa gaya to phas jayenge.” Dusre nakabposh ne kaha.
Phir darwaza kholkar dono bahar nikal gaye.
Yashpal Chopda flop film produsar tha. Usne ab tak do filme banai thi aur dono hi flop hui thi. Ashok Arora uska dost bhi tha uar partner bhi. Yash ne flat ke porch me jakar car roki. Ashok neeche utarta hua bola, “Yash! Aaj to bhabhi ke haath ka khana khane ki ichcha hai.”
“Bewakoof hai tu to?”
“Kyo?”
“Raat ke barah baj rahe hai. Wo so rahi hogi. Tujhey khana khilane ke liye apni neend kharab nahi karegi.”
“Mai to majak kar raha tha yaar, khana to hum parti me kha aye hai. Hum bhi jakar so jayenge.”
Darwaza khula hua tha, dono andar dakhil ho gaye. Palang par wahi aurat leti hui thi.
“Madhoo!” Yashpal ne poocha, “Kya so gayi?”
Do-teen par puchne par bhi jab wah nahi boli to yash use hilta hua bola, “Madhoo dekh Ashok aaya hai.”
Is baar bhi jab wo nahi uthi to yash bola, “Yaar, kuch gadbad lagti hai.”
Ashok ne uski nabz dekhi to cheekh utha, “Bhabhi to mar chuki hai.”
|
|
|
Post by jmianshul on Mar 26, 2018 15:04:03 GMT 5.5
Update 2
Ashok ne uski nabz dekhi to cheekh utha, “Bhabhi to mar chuki hai.”
“Nahi.........Nahi........tum jhoot bol rahe ho.” Yash cheekh utha, lekin jab use vishvas ho gaya ki Madhoo nahi rahi to wo uske upar girkar rone laga.
Ashok ne turant Police ko phone kar diya, phir pass aakar uske kandhey par haath rakhkar bola, “Dheeraj se kaam lo Yash, maine police ko phone kar diya hai.”
“Police ko kyo? Yah swabhavik maut lagti hai, hatya ka mamla nahi lagta hai/”
“Kya tum bhool gaye bhabhi ka lakho ka beema hai, agar Police karyawahi poori nahi hui to tumhe beeme ka ek bhi paisa nahi milega.”
“Meri Madhoo mujhey chod kar chali gayi, mai beeme ka rupya lekar kya krunga?” Yash phir ro pada.
Thodi der baad Inspector Balbir apne dalbal ke saath waha pahuch gaya, phir Police karwahi shuru ho gayi. Madhoo ki lash ka Postmartam hua. Report me likha tha ki maut heart-fail se hui hai. Phir Madhoo ki lash uske pati Yashpal ko antim sanskar ke liye de di gayi. Madhoo ki arthi me Filmi duniya ke kai log shamil hue, phir uski lash chita par jala di gayi.
Salma aur Iqbal hath me hath dale khilkhilate hue kamre me pravesh karte hai. Kamre me koi nahi tha.
“Sallo Ji.”
“Kahiye Ikko Ji.”
“Ek-ek cup coffee chalegi?”
“Chalegi nahi, balki dudegi, bahut thak gayi hu.”
Iqbal bholu ko awaz lagane hi wala tha ki wo khud ndar dakhil hua aur ek card use thama diya.
“Abe maine tumse coffee mangi thi, yah card nahi.”
“Lekin coffee ke liye to aapne kah hi nahi.”
“To ab kah raha hu. 100 Kms ki rafter se ja, 200 Kms. ki rafter se coffee bana aur 300 Kms ki rafter se vapas aa.”
“In card wale sahib ko kya kah du?”
“Inko kisse milna hai?”
“Rajan Sahab se.”
“To unke pass card lekar ja, apun logo ko kyo bore kar raha hai?”
Bholu chala gaya to Iqbal bola, “Sallo darling, jab tak Bholu coffee lekar aata hai tab take k round dance ho jaye.”
“Ho jaye.” Salma ne hath uthakar kaha.
Iqbal ne record player par English dhun ka gana laga diya, phir dono thirakne lage.
Udhar Rajan ne card dekhkar Bholu se kaha, “Bhej do unhe, saath me do cup coffee bhi le aana.”
Bholu chala gaya. Thodi der baad ek adhed umra ke vyakti ne kamre me pravesh kiya. Rajan ne uthkar unse haath milaya, phir bola, “Baithiye.”
Baithne ke baad wah vyakti bola, “Mai Bharat Insurance Company ka Managing Director Atul Gosh hu.”
“Card se aapka parichai mil gaya tha, farmaiye kaise takleef ki?” “Mai ek case lekar tumhare pass aaya hu. Madhoo ke policy number 408 hai jo ki 23 May 1957 ko uske pati Yashpal Chopda ne uska beema karwaya tha. Ab uski maut ho gayi hai.”
“Aur aapko shaq hai ki ye maut swabhavik nahi hai balki kuch gadbad hai?”
“Haa!”
“Beema kitne ka hai?”
“30 Lacs. Ka.”
“Itni jyada rakam k bema aapne kaise kar liya?”
“Madhoo ke umra 24 saal thi. Doctors ki report ke anusar wo puri tarah se swasth thi, unhe koi bimari bhi nahi thi. Doctors ke mutabik wo 60 saal se jyada jee sakti thi.”
“Kuch kiste bhi dee hongi?”
“Haa! 10-10 Hazar ki barah kishte bhari ja chuki hai.”
“Unke pati kya karte hai ?”
“Film Producer hai, Yashpal Chopda, jinhone ‘Tu Chal Mai Aaya’ aur ‘Dal Par Kaova Bole’ filme banai thi.”
“Aur dono flop ho gayi thi ?” Rajan ne muskurate hue kaha.
“Haa!”
“Unki patni ko satta aur jua khelne ka bahut showk tha ?”
“Aapne theek pahchana. Postmartam ki report ke anusar Madhoo ki maut Heartfail se hui hai, lekin mujhey na jane kyo gadbad najar aa rahi hai.”
“Aap mujhse kya chahte hai ?”
“Beema ka company ko lakho rupya dena padega. Mai chahta hu ki use pahle tum jach kar lo.”
“Agar jaach ke baad bhi koi natija na nikla to hamara samay aur dhan dono barbad hoga.”
“Samay ka nuksan to mai nahi bahr sakunga, lekin dhan ka nuksan company ki taraf se bhar diya jayega.”
|
|
|
Post by jmianshul on Mar 26, 2018 15:05:18 GMT 5.5
Update 3
“Samay ka nuksan to mai nahi bahr sakunga, lekin dhan ka nuksan company ki taraf se bhar diya jayega.”
“Theek hai, iss case ki jaach ho jayegi.”
“Shukriya.”
Tabhi Bholu coffee le aaya. Coffee peen eke baad jab director chala gaya usi samay Iqbal andar aaya.
“Kya Salma chali gayi ?” use dekhte hue Rajan ne poocha.
“Ha lekin tunhe kaise pata chala ki Salma yaha aai thi ?”
“Mai to ye bhi bata sakta hu ki Salma ne tumhare saath dance bhi kiya tha aur uska sir bhi kai baar tumhare kandhey se takraya tha.”
“Ab is rahasya par se parda bhiu utha do.”
Rajan ne uske coat se do baal nikalkar Iqbal ki hatheli par rakh diye. Iqbal balo ko style se jeb me rakhta hua bola, “Wo to gulab ke phool lana bhool gayi thi, isliye apne pyar ki nishani ke roop me yh baal mere coat par chipka diye the.”
Rajan has pada.
“Abhi abhi jog aye hai, jante ho kaun the ?”
“Bharat Beema Company ke Director Mr. Ghosh the, beeme-veeme ka lafda lagta hai.”
“Yaar tumhare muh se aisi bhasha achchi nahi lagti jaise ‘lullu ka thathpa’.”
“Sirf kaam ki baat ?”
“Yaar un khas shabdo ka matlab to pooch lete.”
“Batao.”
“Ullu Ka Pattha.”
Rajan has pada, phir bola, “Suna hai ajkal tum bahut buddhiman ho gaye ho ?”
“Dushman ne udai hogi, lekin dushman bhi kabhi kabhi sach kah deta hai. ‘Num ki dalao’ bhi aisa kah rahi thi.”
“Kya matlab hua ?”
“Manu ki aulad. Wah galat nahi kah sakti, isliye ho sakta hai apun buddhiman ho gaye ho.”
“Iss baar mai chahta hu kit um ek case suljhao.” Rajan muskurata hua bola, “Chaho to Salma ki sahayta le sakte ho.”
“Manjoor hai.”
“Jaroorat padi to meri wa Shobha ki sevae bhi uplabdh hongi.”
“Case batao.”
Rajan ne bema company wali sari baat use bata di. Sunne ke baad Iqbal bola, “Yani Mr. Gosh baal ki khaal khichna chahte hau.”
“Kya matlab ?”
“Jab Police aur Postmartum ki report use heartfail ki maut karar de chuki hai to wah jabran apni tang kyu ghused rahe hai.”
“30 Lacs ka mamla hai. Isliye bema company apni puri tasalli kar lena chahti hai. Ab is chote se case ko tum hal karo.”
“Kya ab mai Madhoo ki lash ki atma se pochtach krunga.”
“Harz hi kya hai ?” Rajan muskurata hua bola, “Agar lagan se kaam kroge to uski aatma bhi sachchai batane ke liye aa sakti hai.”
“Are baap re.”
“Shayad mai is case ko hath me na leta, lekin Yashpal ek fraud aadmi hai. Wo pahle bhi kai logo ki badi badi rakame hazam kar chuka hai.”
“To tum soch rahe ho ki 30 lacs Rs. prapt karne ke liyeusi ne apni patni ki hatya ki hai ?”
“Aisa ho sakta hai. Waise film line me kai ghinone apradh pal rahe hai, ho sakta hai ki koi aur karan ho.”
“Beda gark ho, is beema company ka jisne baithe bithaye itna bada bojh sir par daal diya hai. Meri garden to abhi se tuti ja rahi hai.”
“Mere vichar se iske peeche koi gahra rahasya chupa hua hai. Jab bhed khulaga to tumhari garden nahi tutegi balki band aakhey khul jayengi.”
“To mai is case par kaam shuru kar du ?”
“Kya case shuru karne se pahle mujhey tumhare mathe par magal tilak lagana padega ya thali lekar pooja karni padegi ?”
“Waise ye dono kaam karte hue tum bahut sundar lagoge.”
“Ab jate ho ya mai mangal tilak lagan eke liye uthu ?”
Rajan ne jaise hi haath uski traf badaya Iqbal jhatke se peeche hatta hua bola, “Apna haath dur rakkho. Duniya me mujhey isi se sabse jyada dar lagta hai.”
Rajan has pada.
|
|
|
Post by jmianshul on Mar 26, 2018 15:06:32 GMT 5.5
Update 4
Wo bahut badi imarat thi, jisme 300 kamre the. Un kamro me film walo ke office the. Badi company walo ke pass hi do-do kamre the. Lekin choti company wale ek hi kamre se kaam chalate the. Usme bhi partition dalkar hisse kar diye gaye the. Imarat paach manjila thi.
Do naujavan neeche se us imarat ko ghoor rahe the, jiske phatak par ek pathan chowkidar baitha tha.
Unme ek naujavan ki to choti-choti muche wa hero cut baal the. Usne shirt pant pahan rakkhi thi dusre naujavan ki badi wa ghani mooche thi. Usne kali sherwani aur chudidar pajama pahan rakkha tha. Sir par topi thi.
Chowkidar ne dono ko dhyan se dekha, phir poocha, “Kuche, tum kisko mangta ?”
“Secretary !”
“Ji sarkar !” Mooch wala bola.
“Aap kya pooch rahe hai bataiye inhe.” Naukavan darban ki taraf ishara karta hua bola.
“Kyat um inhe nahi jante darbanji ?” mooch wala darban se mukhatim hokar bola.”
“Nahi.”
“Ye 1990 ke hone wale bade hero hai.”
“Yaha kisliye aye hai ?”
“Film company se milna hai.”
“Is ajayab khane me bhut si film company hai bradar, tum kaun si company ko mangta ?”
“Chote sarkar, kya naam hai us film company ka ?”
“Ladure Bandar Pictures.”
“Lodre Brother Pictiures hoga.”
“Han...........Han............Wahi.”
“Teesre male ke karma number 201 me chale jaiye.”
“Phir dono ne jabardasti darban se haath milaya aur andar ki taraf badh gaye. Andar pahuchkar mooch wale ne poocha chote sarkar, kya lift se challenge ?”
“Chote sarkar nahu chote sahib, yes sir bola karo. Naya jamana aa gaya hai.”
“Ikko ! raub daloge to bhed khol dungi.”
“Dungi nhi dunga bolo sallo darling.”
“To yaad rakkho, ab mujhpar raub nahi daloge ?”
“Nahi dalunga meri maa, ab chalo.”
Salma has padi. Phoir dono lift dvara teesre male par pahuche. Ye log koi aur nai Iqbal aur Salma the. Jo ki apne dhang se jasoosi karne nikle the.
Waha rahdari me dono taraf kamre bane the. Kamro ke bahar film company ke namo ki patti lagi hui thi. Jyadatar kamro ke bahar chaprasi stool par baithe the. Tabhi ek mota sa vyakti unke pass se lahrata hua nikal gaya. paav ke sath sath uske hath bhi hil rahe the.
“Yah mota bhaisa koun tha ?”
“Filmo ka comedian Mehmood.”
“Bada dalda naam hai.”
“Safal film actaro ke aise hi dalda naam hote hai.”
“Tab to hum apna filmi naam golgappa rakhenge. Ladkiya wa aurate golgappa khan eke sath sath apna naam bhi liya karengi aur hum rato raat hero ban jayenge.”
“Apni surat dekhi hai shishe me ?” Salma boli, “Zero lagte ho.”
“Yah naam bhi achcha hai, zero yani hero, lekin in mooch me tumhe koi bhi heroine nahi banane wala.”
“Jyada bakwas karoge to mooch utar dungi aur phir tumhare sir par meri chappale barasne lagengi.”
“Tum to yuhi garam ho jati ho Sallo ji, jara thandi raha karo. Aage se apne pass barf ke tukde rakunga. Jab bhi garam hui, muh me thoos diye.”
“Bakwas nahi.”
“Bilkul nahi.”
Dono aage badh gaye. Dus kamro ke baad ek kamre ke bahar ‘Lodre Brother Pictures’ ki patti lagi thi. Dono wahi ruk gaye.
Stool par baithe chaprasi ne poocha, “Kisse milna hai ?”
“Producer se.”
“Kaam kya hai ?”
“Tumhari khopdi par tel malish krni hai.”
“Naraj kyo hote hai sarkar !” Salma boli, “Yah garib kya jane aap kitne bade hero hai”
“Hero.......kaun si film ke ?”
“Film ka naam producer batayega.”
“Jaaiye sahib.”
“Secretary !”
“Yes Sir.”
“Isne hame pahle hi pahchan liya hai ki hum bahut bade hero banne wale hai, isliye ise 10 rupye inam diya jaye.”
Salma ne jeb se 10 ka note nikalte hue dheere se kaha, “Bahut bade jagirdar hai. Hero banne ke liye yaha aaye hai.”
“Aapne pahle kyo nahi bataya ?” Chaprasi 1- ka note pane ke baad khush hota hua bola, “Bhagwan jhoot ne bulaye, yah to dekhne se hi hero lagte hai. Amitabh Bachchan wa Dharmendra ki bhi chutti kar denge.”
“Secretary, hum khush hue, 10 rupye aur de do.”
“Agar is tarah aasman par chadkar rupye lutate rahe to diwala nikal jayega.” Salma budbudate hue boli.
“Pyare chaprasi ji.” Iqbal bola, “Bki rupaye udhar rahe. Hum hero banne ke baad byaj sahit, yani 10 ke 100.”
Dono andar pravist ho gaye aur chaprasi badbadane laga ‘ Aa jate hai hero banne, kangal kahi ke.”
|
|
|
Post by jmianshul on Mar 26, 2018 15:07:34 GMT 5.5
Update 5
Us ek kamre ke bhi hisse the. Samne hi ek budha vyakti choti si mez ke peeche baitha tha.
“Kahiye !” Budhe ne poocha.
“Producer sahib se milna hai.”
“Andar chale jaiye wo wahi baithe hai.”
Lakdi ka partition dalkar ek aur karma banaya gaya the. Dono usi kamre me chale gaye. Us kamre me Yashpal aur Ashok ke saath ek aurat bhi baithi hui the. Jo jyada makeup ke karan kuch naukar type nazar aa rahi thi.
“Kaun hai aap aur kya chahte hai ?” Yashpal ne poocha.
“Secretary.” Iqbal ladkiyo se bhi kuch jyada sharmata hua bola, “Tum hi bata do.”
“To yah aapke secretary hai ?”
“Mai hark am advance me karta hu sahib. Hero banne ke bad to secretary rakhna hi padta hai isliye pahle hi rakh liya.”
“To aap hero banne aaye hai ?”
“Ji han.”
“Lekin aap to dulhan ki tarah Sharma rahe hai.” Aurat boli, “Heroine ke saath bagiche me gate hue agar Sharma gaye to kaise chlega ?”
“Mata ji, sharmata kaun hai, mai to acting kar raha tha.”
“Aur mai tumhe mataji nazar aati hu....?”
“To phir aap kya hai, bahanji, bhabhi ya mausi ?”
“Shut-up !”
“Are baap re !” Iqbal ne kuch is tarah uchalkar kaha ki sab has pade. Hasi us aurat ko bhi aagayi thi.
Kuch chado baad Ashok ne poocha, “Aapne pahle kaam kiya hai ?”
“Jagirdar ka beta hu. Baap lakho ka aasami hai. Ghar me maukar-chakar hai, phir mujhey kaam karne ki kya avashyakta hai ?”
“Mera matlab acting se tha.”
“Mai to paida hote hi actor tha. Paida hone ked us minute baad jaise hi doctor aayi maine rote hue use aankh maar di thi. Mausi ne jaise hi mujhe god me uthaya maine unki saadi par su-su kar diya.”
“Sahab !” uske chup hote hi Salma khat se boli, “Yah janvaro ki boliya bhi bahut achchi nikal lete hai.”
“Yah baat hai to ghode ki boli bolkar dikhaiye.”
Iqbal ne pahle gla khankharkar saaf kiya, phir wo bade shandar dhang se hinhinane laga.
“Wah !” Yashpal bola, “Maza aa gaya, ab zara gadhey ki boli bolkar dikhaiye.”
“Kya hero banne ke liye ghode aur gadhey ki boli bolna jaroori hai ?” Iqbal ne murkho ki tarah palke jhapkate hue kaha.
“Bahi sahib ! hero banne ke liye sarvkala sampnn hona chahiye.”
“Tab to mujhey Bandar ki tarah nachna bhi ana chahiye ?”
“Heroine hero koi khud hi nacha leti hai. Uski jaroorat nahi. Aap to gadhey ki boli bolkar bataiye.”
Iqbal ne bebasi se Salma ki taraf dekha. Salma apni hasi dabati hui boli, “Sir, aap to ullu aur kauve ki boli bhi bol sakte hai. Gadhey ki boli bolna to aapke liye aasan hai, bol dijiye. Ho sakta hai is tarah aap jald hero ban jaye.”
Phir Iqbal ne dhechu-dhechu bolna shuru kiya to sabne to badi mushkil se apni hasi daba li, lekin wo aurat buri tarah hasne lagi aur Iqbal ki dhechu-dhechu par break lag gaye.
Yashpal ne khaskar apni ahsi par kaboo kiya, phir poocha, “Aapka naam kya hai ?”
“Ghar ka ya filmi.”
“Dono batiye ?”
“Ghar me to Achchan Miya kahte hai. Waise apun ka filmi naam zerokumar hai.”
“Zero kyo ?”
“Gadit me zero hi sabkuch hota hai. Ek me zero laga do to dus, dus me zero laga do to sau ur sau me zero laga do to hazar ban jata hai yani zero hi bada hota hai. Usi prakar ab film line me zero sabkuch hoga yani topam top.
“To Zerokumar ji .” Yashpl bola, “Aap ban gaye, lekin agle saal.”
Iqbal ka muh latak gaya.
Aurat unse vida lekar chli gayi.
Salma ne baat bigadte dekhi to Yashpal ko ishare se ek taraf bulaya aur awaz ko bhari banati hui boli, “Aap mujhey sharif aadmi nazar aa rhe hai, isliye insaniyat ken ate mai aapse ek sahayta chahta hu.”
“Kaisi sahayta ?”
“Yah bahut bade jagirdaar ke bête hai, inhe hero banne ki sanak yaha tak kheech layi hai.”
“Kitni jaydad hogi inki ?”
“Ek carore se kam nahi hai. Achchan Miya bigde hue rahees hai. Idhar-udhar bhatkte rahenge aur apni pooji lutate rahenge. Mai chahta hu, aap inhe kisi tarah rok lijiye, jo kharcha hoga, use double aapko mil jayega. Jab hero banne ka bhoot inke sir se utar jayega to mai inhe wapas le jaunga.”
“Yani ye sachnuch karodepati hai ?”
“Khandani rahees hai sahib.”
“Theek hai, aap inhe lekar mere ghar hi aa jaiye taki achchan miya idhar udhar na bhatke.”
“Yah to aur bhi achcha hoga.”
Tab wo log wapas apni jagah par aa gaye to Iqbal ne ruvase swar me poocha, “Mere bhagya ka faisala hua ya nahi ?”
“Aapko humne apni comedi film ka hero chun liya hai.”
“Kya ?” Ashok ne ashcharyachakit swar me poocha.
Yashpal ne use aankh marker chup rahne ka ishara kiya. Shayad wah samajh gaya tha isliye Iqbal se haath milate hue bola, “Badhai ho Achchan Miya aakhir aap hero ban hi gaye.”
“Shukriya janab, balki dhanyavad va thankyou bhi. Secretary !”
“Ji Sarkar !”
“Car ko dafa karo, sirf sir kaho. Aaj hum hero ban gaye. Bade hero ki pahchan hai, agar koi autograph lene aaye to usse kah do ki bathroom me vyast hai.”
Tabhi ek ladka ketli wa do khali cup haath me pakde andar aaya aur bola, “Seth kahta hai, pehle pichla udhar cukaiye phir chai cigarette pan udhar me milaga.”
“Kitna bill hai uska ?”
“Chalis rupaye sattar paise.”
“Seth se kahna aaj bank band hai, kal dange.”
“Wo bank band hai to kya hua producer sahib.” Iqbal bola, “Yah bank to khula hua hai. Secretary! Challis rupaye sattar paise ka bill chukao aur bees rupaye advance de do. Aise muke par gulabjamun, samose aur chai aani chahiye.”
Salma ne ghoorkar use dekha, phir usne rupaye ladke ko de diye. Ladka salam karke chala gaya.
Yashpal bola, “Aapne rupaye kyo de diye ? aap to hamare hone wale hero hai.”
“Jab hero banuga to yah sare rupye bhi wasool lunga.”
Thodi der baad chai nashta aa gaya aur phir waha ka mahaul Iqbal ki bato se aur hasya bhara ho gaya.
Jate samay Yashpal ne Ashok Arora ka partner ke roop me prichay karaya. Ek aur partner bhi tha, Anil Vermani, jo us samay waha maujood nahi tha.
|
|
|
Post by jmianshul on Mar 26, 2018 15:31:15 GMT 5.5
Update 6
Phone ki ghanti bajte hi Rajan ne receiver uthakar poocha, “Kaun ?”
“Apun Lodre Brother Pictures ke naye hero bol rahe hai.”
Iqbal ki awaz pahchante hue poocha, “Salma bhi tumhare saath hai ?”
“Wo apni nakli mooch ko taav de rahi hai aur jalkar koyla ho rahi hai.”
“Kyo ?”
“Kyuki apun hero aur wo zero banker rah gayi hai. Is samay wo pahalwano ki tarah apni mooch par is tarah taav de rahi hai, jaise mujhey uthakar patak degi.
“Bakwas karne ka mai hero banne ja raha hu, wo kangal ho chuki hai. Chai, paan, cigarette ka chalis rupaye ka bill bhi nahi de saki. Hero banne ke josh me wah maine ada kiye. Do filme bana chuke hai aur dono flop hui hai.”
“Aur kuch ?”
“Nai film banane ke naam par vitrako ka kafi rupya hadap chuke hai Yashpal, Ashok, aur Anil Vermani. Teeno hi number ek chalbaaz nazar aate hai.”
“Tum dono ki kya istithi hai ?”
“Moochwali Salma ne mujhe karodpati jagirdar ke bigde hue sahabjade ke roop me parichay karaya hai aur kuch rupya dene ka bhi lalach diya hai, isliye Yashpal hame apne purane ghar me thahrane wala hai. Shahar se bahar purana sa bangla hai. Mujhey to aisa lagta hai ki jaise waha bhoot rahte ho.”
“Naye flat me kyo nahi ja rahe ?”
“Uska ek saal ka kiraya nahi chukaya. Flat malik use saman sahit bahar fikwane ki dhamki de chukka hai. Waise ek baat advance me bata dena chahta hu.”
“Kya ?”
“Uske karibi logo se maloom hua hai ki wo apni patni Madhu ko apni jaan se bhi jyada chahta tha. Uski judai ek pal ke liye bhi sahan nahi thi, phir tumhi batao, wo uski hatya kaise kar sakta hai ?”
“Kuch bhi ho Iqbal miya, is hatya ke peeche bahut bada rahasya chupa hua hai aur us rahasya par se tumhi ko parda hatana hai. Uske asspass ke logo par nazar rakkho. Uske alawa aur koi bhi to Madhu ka khoon kar sakta hai.”
“Aur kaun ?”
“Anil Varmani, Ashok Arora ya koi aur.”
“Tab to mujhey apni sallo darling par bhi nazar rakhni hogi. Wo bhi asspass maujood hogi. Vaise badi badi mooch me wo bhayankar apradhi nazar aati hai.”
“Bakwas nahi!”
“Maan Liya, lekin yaha jo meri jeb se kharch ho raha hai, wo kaun dega ?”
“Beema company ka director Atul Ghosh.”
“Yaar mai to soch raha hu ki kahi Atul Gosh hi katil na ho.”
“Katil jo bhi ho, use tumhi ko pakadna hai.”
“OK!” Iqbal ne kaha aur receiver rakhkar jaise hi muda, use Salma dikhai di, jo kamar par haath rakkhe use ghoor rahi thi.
“Iss tarah mat dekho, dil me kuch hota hai, mai kaap kaap jata hu. Jab bhook lagti hai tab bhi kuch nahi kahta hu.”
Uski jhak ki taraf dhyan na dete hue Salma gaurrai, “Phone par kya bakwas kar rahe the, badi badi mooch me mai badi bhayankar lagti hu.” Kahne ke saath hi wo aage badhi aur uski chati par mukke marne lagi.”
“Iss tarah mat maro, mar jaoonga.”
“To kaan pakadkar dus uthak baithak lagao, warna mai phir shuru ho jaaongi.”
“Nahi-nahi........tum shuru mat hona, mai shuru ho jata hu.”
Iqbal ne baukhlaye swar me kaha aur kaan pakadkar jaldi jaldi uthak baithak lagane laga.
Salma aponi nakli mooch ko taav deti hui muskurani lagi.
Udhar Rajan us tasveer ko dekh raha tha, jo beema company ke director Atul Gosh ne use di thi. Wah Madhu Chopda ki tasveer thi, jo Yashpal Chopda ki patni thi. Shayad wo us tasveer me koi rahasya khojne ki koshish kar raha tha.
|
|
|
Post by jmianshul on Mar 26, 2018 15:32:38 GMT 5.5
Update 7
Inspector Balbir Rajan ko apne office me dekhkar chowka phir bola, “Tum yaha ? Koi khass baat lagti hai. Baitho!”
Rajan baithte hue bola, “Idhar se guzar raha tha socha aapke darshan kar lu.”
“Darshan to tumne kar liye, ab wo kaam bhi bata do jiske liye tum yaha aaye ho ?”
“Bahut parkhi ho gaye hai.”
“Balki yu kaho ki hum lifafa dekhte hi mazmoon bhap lete hai.”
Rajan ne haste hue kaha, “Aapne theek kaha. Mai Madhu Chopra ki maut ke bare me kuch jankari prapt karne aaya tha.”
“Wah case mere hi haath me tha, lekin wah to sadharan maut ka case tha. Maine lash ka nirikshad kiya tha, lekin mujhey koi bhi shaq wali baat nazar nahi aai.”
“Postmartum ki report kya kahti thi ?”
“Dil ki dhadkan wa saas ruk jane se Madhu ki maut hui thi.”
“Lekin dil ki dhadkan ke sath saas rukne ki baat samajh nahi aai ?”
“Hai to ajeeb baat, lekin postmartum ki report aisa kahti thi, isliye humne case wahi khatam kar diya, lekin tum is case ke bare me kyo chan been kar rahe ho ?”
“Madhu ka 30 lakh ka beema tha. Beema company ke director Atul Gosh chahte hai ki mai is case ki poori chan been karu. Shayad baad me unhe shaq hua hai, Madhu ki maut svabhavik nahi hai.”
“Oh!”
“Yashpal Chopra ki us samay kya pratikriya thi ?”
“Use Madhu se bahut pyar tha. Us samay uska rona dekhkar mera dil bhi paseej gaya tha.”
Ye sab sunkar Rajan kuch minto tak khamosh raha, phir usne kaha, “Kya aap mujhey wah file dikhayenge, jisme gumshuda ladkiyo ki tasveere hai.”
Balbir ne ek sipahi ko kahkar wo file mangwa li. Rajan panne palatkar tasveere dekhne laga. Ek tasveer par uski nazar tik gayi. Phir wah us par ungli rakhkar bola, “Mai is tasveer ko sath le jana chahta hu.”
Balbir ne ijazat de di.
Rajan us tasveer ko lekar ghar aa gaya, ghar par us samay Shobha maujood thi. Rajan ne muskurate hue poocha, “Tum kab aayi ?”
“Aadha ghanta ho gaya hai. Jane ka vichar kar rahi thi ki tum aa gaye. Lagta hai ki kisi case par kaam kar rahe ho ?”
“Ha!” Rajan ne kaha aur almari se Gosh ki di hui tasveer nikal kar milane laga. Phir kuch minto bad dono tasveero ko mez par rakhne ke baad bola, “Kya in dono tasveero me tunhe kuch antar najar aata hai ?”
Shobha bade dhyan se kuch der tasveero ko dekhti rahi, phir boli, “Agar samanya dhang se dekha jaye to koi antar nahi hai, lekin dhyan se dekha jaye to ek ladki ki naak kuch moti hai dusri ki patli. Ek ki thuddi me gaddha hai dusri ke gaddha nahi hai.”
“Shabash Shobha !” Rajan muskurata hua bola, “Yahi dono antar maine bhi anubhav kiya hai, lekin alag alag dekha jaye to koi bhi in par gaur nahi karega, waise makeup se dono ki naak ek jaisi ki ja sakti hai. Thuddi ka gaddha bhi bara ja sakta hai.”
“Tum theek kah rahe ho. Lekin chakkar kya hai ?”
Madhu ki tasveer dekhne ke baad mujhey aisa laga jaise maine isse milti julti tasveer kahi dekhi hai. Sochne par yaad aya, thane me maujood gumshuda logo ki file me maine aisi tasveer dekhi thi. Ab mujhey sara chakkar samajh me aa raha hai.”
“Yah dusri tasveer kiski hai ?”
“Lata ki, jo film ki heroin banne aayi thi, jise ek din gayab kar diya gaya.”
“Chakkar abhi bhi mujhey samajh nahi aaya?” Shobha ne poocha.
Phir Rajan Shobha ko sari kahani batane laga.
|
|
|
Post by jmianshul on Mar 26, 2018 15:39:32 GMT 5.5
Update 8
Wo purani imarat bhi Yashpal ki nahi thi. Uska malik ek Madrasi tha, jisse usne wah purahi imarat kafi kam kiraye par lee thi. Us Madrasi ko mare ek saal ho gaya tha, wo imarat ab usi ke kabze me thi.
Wo imarat ek teele par bani hui thi. Baki imarate bhi thode door door bani hui thi. Dekhbhal na hone ke karan compound me jhadiya ug aayi thi. Deewar ke sath lage ped bhi kafi bade ho gaye the. Raat ke samay wo bangla kafi bhayanak nazar aata tha.
Us ilaake ka ek chowkidar tha, ek chabi uske pass rahti thi. Kabhi kabhi wahi us bangle ki safai kar diya karta tha. Yashpal se use pachas rupya mahina mil jate the.
Jab Yashpal, Salma aur Iqbal ke saath waha rahne ke liye aaye to bangla saaf suthra tha. Anil Vermani aur Ashok Arora bhi unke saath the.
Chowkidar usi samay waha pahuch gaya. wah pacho sofe par baithe the. Chowkidar farsh par baithta hua bola, “Sahab, aap aa gaye, bahut achcha kiya, varna mai khud aapke pass aane wala tha.”
“Kyo ?” Yash ne poocha.
“Aap Madhu memsaab ke sath pahle yahi rahte the. Unki maut ke kuch mahine pahle hi aap yaha se gaye the.”
“Ha phir ?”
“Parso jab mai safai karne yaha aaya to Madhu memsaab ka kamra khula hua tha aur dining room me lagi badi ghadi chal rahi thi. Jabki maine usme kabhi chabi nahi di.”
Sab ki nazar dewar par lagi badi ghadi ki taraf ghoom gayi, jiska pendulum daye-baye hil raha tha aur second ki sui ghoom rahi thi.”
“Yaar!” Anil bola, “Ghadi to chal rahi hai.”
Aur Yashpal ke chehre par gambhirta ke sath sath apni ptni ko yaad karke kuch udasi bhi aa gayi thi.
“Aur kya dekha tumne ?” Ashok ne poocha.
Kamre me ek billi mari padi thi, jiski garden dhad se alag thi. Farsh par khoon phaila hua tha.
“Oh!”
“Phir raat ko maine is imarat me ek aurat ko ghoomte dekha. Mere dekhte hi dekhte wo na jane kaise chat par pahuch gayi, phir chat se kood gayi, mai jab duadkar waha pahucha to us jagah koi nahi tha.”
“Tum kahna kya chahte ho ?” Yashpal ne poocha.
“Sahab! Wo avashya koi pretni thi.” Chowkidar ne kaapte hue swar me kaha.
Bhay ki lahar sabke chahro par daud gayi.
“Secretary!”
“Yes Sir.”
“Tum ne suna, is bangle me ek pretni bhi rahti hai.” Iqbal bola, “Tumne kabhi pretni dekhi hai ?”
“Bas gaon me lohar ki patni markar pretni ban gayi thi. Maine use bargad ke ped par latakte hue dekha tha. Lambe lambe naakun aur daat the. Mai to waha se dum dabakar bhag liya tha. Salma ne bataya.
“Lekin is samay to tumhare dum nahi hai. Kahi bargad wali pretni to nahi le gayi ?”
“Dum ab nahi hoti Sir, maine to muhavra bataya tha.”
“Theek hai – theek hai, lekin lohar ki biwi pretni kyu ban gayi thi ?”
“Madhu memsaab se milti thi.”
“Secretary !” Iqbal moorkho ki tarah bola, “Madhu ka matlab shahad hota hai na ?”
“Yes Sir.”
“To memsaab shahad kaise ho sakti hai ?”
“Yah to Mr. Yashpal hi batayenge?”
Yashpal ki aakhe bheeg aaye thi.
Anil bola, “Madhoo Yashpal ki patni thi. Lagbhag ek mahina pahle unki maut ho gayi thi.”
“Hatya hui hogi.”
“Nahi, heartfail ho gaya tha.”
“Khuda unki aatma ko shanti de aur pretni banne se bachaye.”
Salma ne poocha, “ Kya unke daat aur nakhoon bhi lambe lambe the?”
“Nahi.” Chowkidar ne bataya, “Wo to bahut khoobsurat thi.”
“Tab to wo chudail hogi. Suna hai, chudail bahur sundar hoti hai.”
“Achchan miya.” Yashpal barraye swar me bola, “Kripya aisi baat mat kariye.”
“Kya aapko dar lagta hai? Dar to mujhey bhi lagta hai sahab.”
Kuch chadon ki khamoshi ke baad Anil bola, “Kahi Madhu Bhabhi ki aatma na yaha bhatak rahi ho?”
“Ha Sahab.” Chowkidar bola, “wah avashya aatma hi thi kal bhi maine unhe is bangle me dekha tha.”
“Kab?”
“Savere jab mai safai ke liye is bangle par aaya to madhu memsaab ke kamre ka darwaza khula tha. Maine jhakkar dekha to chowk utha, memsaab palang par lihaf odhkar leti thi. Mai darkar waha se bhag liya. Thodi der baad mai himmat karke phir vapas aaya to dekha, darwaza band hai. Maine kholkar dekha, palang par koi bhi nahi tha. Palag par saaf suthri chadar is tarah bichi hui thi ki jaise waha koi leta hi nahi ho.”
Iqbal kaapte hue swar me bola, “Mujhey to bahut dar lag raha hai sahib. Secretary!”
“Yes Sir.”
“Kya tumhe bhi dar lag raha hai?”
“Nahi.”
“Abe! Yaha preto aur aatmao ki baat ho rahi hai aur tumhe dar nahi lag raha. Tumhe darna chahiye, balki thar thar kaapna bhi chahiye.”
“Suni sunai baato par vishwaas nahi karna chahiye sir. Jab hum apni aakho se pretni ko dekhenge to jaroor darenge. Balki hum dum dabakar bhi bhaag jayenge, par wo dikahi nahi deti.”
Yashpal bola, “Madhu mar chuki hai. Maine apne haatho se uski chita ko aag lagai thi, phir wo vapas kaise aa sakti hai?”
“Hum aatma ki baat kar rahe hai.” Ashok bola.
“Mujhey aatmao wa bhoot pret par vishwas nahi.”
Yashpal apne naukar Deenu ko bhi saath laya tha. Is samay wahi sabse jyada bhaybheet nazar aa raha tha.
Ek to wah bangla waise hi akant me tha, upar se badhta hua andhkar waha ke mahaul ko bhayanak bana raha tha.
Khane ki baat chidi to Iqbal ruaab se bola, “Secretary!”
“Ji Sarkar.”
“Abe, maine kaha nahi tha ki car ko goli maro aur sirf sir kaho.”
“Yes Sir.”
“Tumhe khana banana aata hai?”
“Aata hai.”
“To jaao, Deenu ke saath milkar khana banao.”
“Lekin Sir maine.”
“Mai.......Mai karoge to kaan naak dono pakadkar naukri se nikal dunga. Jaao, adesh ka palan karo.”
Salma ki ichcha hui ki Iqbal ka muh noch le, lekin majboori thi wo aisa kar nahi sakti thi, isliye bura sa muh banati hui chali gayi. Yashpal ne Anil ko bhi unki sahayta ke liya bhej diya.
Unke jaane ke kafi der tak khamoshi chai rahi, phir Iqbal hi khamoshi ko todta hua bola, “Aap apni Madhoo se bahut prem karte the?”
“Apni jaan se bhi jyada.” Yash bola.
“Kya wo bahut bimar thi?”
“Bimari ke baad agar koi mar jai to itna dukh nahi hota, lekin doctari report ke anusar wah poori tarah se swasth thi. Phir na jane kaise use heart-attack aa gaya.” Kahte hue Yashpal ki aakhe bheeg aayi.
“Sorry Mr. Yashpal, mujhey aapki patni ka jikra nahi chedna chahiye the.”
“Koi baat nahi.”
Kaafi der baate hoti rahi, lekin Iqbal koi kaam ki baat nahi ugalwa saka.
|
|
|
Post by jmianshul on Mar 26, 2018 15:41:23 GMT 5.5
Update 9
Dedh ghante me khana taiyar ho gaya aur sab dining table par khana khane lage. Eka ek Iqbal bola, “Mr. Yashpal, kya mai sachmuch hero ban jaoonga?”
“Mr. Yashpal jiske sir par hath rakh de, samajhiye ki wah hero ban gaya.” Ashok bola.
“To Yashpal ji jaldi se mere sir par hath rakh dijiye, kahi bhool gaye to kalyan ho jayega.” Iqbal ne kaha aur khud hi unka hath apne sir par rakh liya.
Sabhi uski jaldbazi aur moorkhta par muskura diye. Yashpal bola, “Aap chinta mat kariye, mai aapko raato raat sitara bana dunga.”
“Yani tara. Yah to koi baat nahi hui. Mai hero banne aaya hu aur aap mujhey tara bana rahe hai.”
“Mera matlab hai filmi aakash ka chamakta hua tara.”
“To yu kahiye, lekin abhi tak aapne meri mada ki baat to ki hi nahi.”
“Mada........mada to janvaro ki hoti hai Sir.” Secretary jaldi se bola, “Jaise haathi ki mada hathni, ghode ki ghodi aur gadhe ki gadhi.”
“Secretary tum moorkh ho. Jaise aadmi ki mada hoti hai aurat, usi prakar hero ki mada heroine hoti hai. Kyu sahbaan, maine galat to nahi kaha? Waise bhi heroine ke bina hero landura hokar rah jata hai.”
“Nahi, aap theek kah rahe hai.” Yashpal apni hasi dabata hua bola, “Aapke sath sabse khoobsurat wa topam top heroine ko liya jayega.”
“Tab theek hai.”
Khane ke baad sab apne apne kamro me chale gaye. Ashok aur Yashpal ek hi kamre me so rahe the.
Ashok latete hue bola, “Yash! Bakra tagda nazar aata hai.”
“Kaun bakra?”
“Wahi Zero Kumar yani Achchan Miya.”
“Karodpati jagirdar ka beta hai. Bees lakh mil jayenge to apne sare karz khatam ho jayenge.” Yash bola.
“Koshish kare to usse itna rupya mil sakta hai.”
“Ha, dekhne ke liye ek film ka mahurat kar denge, jisme wo hero hoga.”
“Theek hai. Kal savere se hi use phasane ki koshish shuru kar denge.”
Salma aur Iqbal ko ek kamre me sona tha. Salma ne darwaza band kiya aur Iqbal ko ghoorne lagi.
“Tumhari mooch ki kasam Sallo darling.” Iqbal chahakta hua bola, “Is poze me bahut sundar lag rahi ho.”
“Mai ab yaha khana banaungi, kyo ?”
“Wo to........wo to!”
“Aur tum nere naak kaan pakadkar naukri se nikal doge.” Salma ne kaha aura age badhkar uske dono kaan pakadkar kheechne lagi, “Bolo, naukri se nikaloge?”
“Are.......are......kaan to chodo, ukhad jayenge.”
“Ukhadne do, uske baad mai tumhari naak bhi ukhadungi.”
“Are baap re, aisa mat karna, warna Hero Kumar se sachmuch Zero Kumar bankar rah jaoonga.”
“Phir aisi galti karoge?”
“Nahi......nahi kroonga.”
“Saza to tumhe milegi, chalo murga ban jao warna sachmuch kaan naak ukhad lungi, mai bahut gusse me hu Ikko.”
“Tab apni Sallo darling ko khush karne ke liye murga bhi banunga aur kukduku bhi karunga.”
Phir Iqbal sachmuch murga bankar kukduku karne laga. Salma has padi, phir khud hi use uthakar pyar bhare lahze me boli, “Chalo, ab letkar so jao.”
“Tumhari god me sir rakhkar sounga, mana karogi to rounga. Lori bhi sunaogi, mujh roothe ko manaogi.”
“Is samay jiddi bachche lag rahe ho.” Salma muskurati hui boli, “Aa ja bachche, tujhey sula du. Ek pyari si lori suna du.”
Salma palng par late gayi. Iqbal uski god me sir rakhkar late gaya aur muh me angootha dalkar bachcho ki tarah choosne laga.
Salma has padi, phir kabran uska angotha muh se bahar nikalte hue poocha, “Madhu ki aatma ke bare me tumhara kya vichar hai?”
“Wo mar chuki hai. Postmartum ki report is baat ki gavah hai, phir wo zinda hokar wapas kaise aa sakti hai?”
“Mai aatma ki baat kar rahi hu.”
“Marne ke baad aatma parmatma me leen ho jati hai, isliye prêt pretni, rooh aur aatma ko mai nahi manta.”
“Lekin maine suna hai ki jo durghatna ka shikar hokar marta hai ya jiski hatya kar di jati hai, uski aatma bhatakti rahti hai.”
“Moocho me kam buddhiman lag rahi ho, dadhi bhi laga lo to jyada buddhiman ho jaogi.”
Salma uske baal khichti hui boli, “Phir bakwas.”
“Nahi karonga Sallo ji, lekin baal chodkar mujhey thapki dekar sulana hoga.”
Salma ne baal chod diye aur sachmuch use thapki dekar sulane lagi. Iqbal ne masti me aakar aakhey band kar ki. Salma ki aakho me is samay uske liye pyar bhara hua tha. Tabhi khatke ki awaz sunkar dono chowke. Iqbal phusphusate hu bola, “Bahar koi hai.”
“Pretni na ho.”
“Isssh! Pretni nahi, koi chupkar hamari baate na sun raha ho, mai dekhta hu.” Iqbal ne kaha aur torch uthai, phir darwaza kholkar bahar aa gaya. charo taraf ek nazar dekhne ke baad vapas aakar bola, “Koi nahi hai.”
Iqbal ne phir darwaza band kiya aur palang par aakar baith gaya aur poocha, “In logo ke bare me tumhara kya vichar hai?”
“Ye log hame purna roop se ollu samajhte hai aur tumhe karodpati jagirdar ka beta samajhkar lootna chahte hai.”
“Hum kangalo se unhe kuch nahi milne wala. Hawa me hi wah hame loot sakte hai. Lekin Yashpal se Madhu ki maut ke bare me kuch bhi maloom nahi ho raha.”
“Jaroori nahi hai ki Madhu ki hatya Yashpal ne ki ho. Anil aur Ashok uske partner hai. Ho sakta hai ki un dono me se kisi ne hatya ki ho.”
“Lekin wo log hatya kyo karenge?”
“Karan hame talash karna hai.”
“Agar unme se koi bhi hatyara na hua to ?”
“To bhi Hero banne ka maza to tum le hi loge.” Salma muskurati hui boli, “Ab so jao.”
Dono double bed par latekar sone ki koshish karne lagi. Tabhi dono hadbadakar uth baithe, unhe ek tez cheekh sunai di thi.
Salma boli, “Kahi phir to koi hatya nahi ho gayi?”
“Bahar nikalkar dekhte hai. Vaise mere vichar se pretni ka chakkar lagta hai.”
“Jane kyo mujhey dar lag raha hai.”
“Yah baat kahne se pahle apni badi badi mooch ka to khayal kiya hota. Tumhari na sahi, is tarah tumhari mooch ki avashya beizzati ho jayegi.”
Salma ne mooch ko taav diya, phir garden akdati hui boli, “Chalo!”
|
|
|
Post by jmianshul on Mar 26, 2018 15:42:37 GMT 5.5
Update 10
Bahar raat ka sannata tha aur hawa sai-sai kar rahi thi. Ped hilte hue aise lag rahe the ki jaise bhoot nach rahe ho. Salama aur Iqbal bahar nikle to unhe Ashok aur Yashpal dekhai diye.
Iqbal ne poocha, “Kya aapne bhi cheekh ki awaz suni thi?”
“Han” Yashpal bola, “Awaz Anil ke kamre ki taraf se aayi thi.”
“Chaliye, wahi chalkar dekhte hai.”
Phir Anil ke kamre ke pass pahuchkar Ashok ne darwaza khatkhatana shuru kiya.
Andar se Anil ne kanpti hui awaz me poocha, “Kaun Hai?”
“Mai Ashok hu, darwaza kholo.”
Kuch chado baad darwaza khula aur Anil bharraye swar me bola, “Tum log aa gaye.”
“Baat kya hai?” Yashpal ne poocha.
“Woh............woh.......aatma thi, Madhu bhabhi ki aatma.”
“Yani Mr. Yashpal ki biwi ki aatma?” Iqbal ne ashcharyachakit hokar poocha.
“Ha”
“Uski aatma tumhe kaha dikhai di thi?” Ashok ne poocha.
“Bahar.”
“Deenu kaha hai?”
“Wo dekho, behosh pada hai.”
Sabne dekha naukar Deenu ek kone me behosh pada hai. Wo Anil ke kamre me hi so raha tha.
“Sabse pahle Deenu ne hi aathma ko dekha tha. Jab isne mere sirhane ke neeche se torch nikali to mai jaag gaya. yeh bahar peshab karne ja raha tha. Iske jaane ke lagbhag dedh minute baad hi maine cheekh ki awaz suni. Mai jaise hi uthkar darwaze ke pass pahucha, yah bhagta hua andar aaya aur ‘Memsaab ki aatma’ kahkar gir pada.
“Maine bahar jhakkar dekha, ek aurat safed labade me lipti compound ke ek taraf se dusri taraf jakar gayab ho gayi. Uske chehre ki maine sirf ek jhalak dekhi thi, wo Madhu Bhabhi jaisi nazar aa rahi thi.
“Mr. Anil.” Iqbal bola, “Aap Deenu ko hosh me lane ki koshish kariye hum bahar dekhte hai.
Phir un logo ne torch ki roshni me bangle ka charo taraf se nirikchad kiya, lekin unhe koi bhi aatma dikhai nahi di. Naukaro ke quater band the. Waha dekhne ki jaroorat nahi thi.
Is beech Yashpal apne kamre me chala gaya tha, toilet jane ke liye.
Baki sab log ek-ek kamre ka nirikshad karte hue Yashpal ke kamre me pahuche, wah kamre ke beechobeech behosh pada tha. Kamre me andhera tha. Saamne ki khidki khuli hui thi.
Salma boli, “Inhe kya hua?”
“Lagta hai, inhone bhi pretni dekh li hai, lekin hosh me lane ke baad hi maloom hoga yah behosh kyu hue hai.”
Paani ki cheete dalkar Yashpal ko hosh me laya gaya. Hosh me aate hi usne bhaybheet nigaho se charo taraf dekha, phir bola, “Wo kaha gayi?”
“Kaun?” Ashok ne poocha.
“Madhu, wo Madhu thi.”
“Madhu ki chita ko to tumne apne haatho se aag lagai thi. Kahi tumne sapna to nahi dekha?”
“Tab eo Madhu ki aatma hogi. Uski aatma bhatak rahi hai Ashok, isi bangle me bhatak rahi hai. Chowkidar sach kah raha tha. Deenu ne bhi usi ki rooh dekhi hogi.”
Iqbal ne poocha, “Kya wo kamre me aayi thi?”
“Mai jab kamre ke andar aaya to maine use khidki ki bahar khade dekha. Wah dono baahe phailae mujhey bula rahi thi. Bhay ke karan maine turant batti bujha di. Agle pal maine andhere me use apne pass paya aur phir mai adhik dar ke karan behosh ho gaya.
Uski is kahani ne bhay ka vatavaran bana diya, kyo ki kab se waha pretni aur aatma ki baate ho rahi thi.
Kuch hi chado baad Anil Deenu ko liye hue kamre me dakhil hua. Dono ke chehro ka rang uda hua tha. Deenu ka mukh o bay ke karan peela pad gaya tha.
“Deenu!” Iqbal ne poocha, “Tumne kya dekha tha?”
“Mai peshab karke wapas laut raha tha to malkin ki aatma khadiyo me prakat hui, safed kafan se lipti hui.”
“Andhere me tumne unka chehra kaise dekh liya?”
“Torch ki roshni me dekha tha. Usi chad mai cheekhkar bhaga aur kamre me girkar behosh ho gaya.”
Sabhi khamoshi se us aatma ke bare me sochne lage, jo us bangle me bhatak rahi thi. Salma wa Iqbal bhi usi ke bare me sochkar pareshan ho rahe the.
Tabhi kisi ke kadmo ki ahat sunkar sab buri tarah chowk gaye. Salma chillakar boli, “lagta hai koi rasoighar ki taraf ja raha hai.”
Sab haatho me torch sambhale tezi ke saath rasoighar ki taraf lapke. Sabka man andar hi andar kanp raha tha.
Rasoighar ka khula darwaza dekhkar Deenu thar-thar kanpte hue bola, “Sahab! Mai to rasoi ka darwaza band karke gaya tha.”
“Wahi aatma na ghus gayi ho andar.” Anil bola.
Sabne ek dusre ki taraf dekha, kisi ki himmat andar jane ki nahi ho rahi thi, tab Salma wa Iqbal sabse pahle andar gaye. Rasoi me koi bhi nahi tha, lekin gas chulha jal raha tha aur uspar ek bada sa pateela rakkha hua tha, jispar dhakkan laga tha. Sadi hui badbu rasoighar me phaili hui thi.
Yashpal ne poocha, “Kya tum pateele me daal ya sabzi chadakar gaye the?”
“Nahi to.”
“Phir jakar dekho, usme kya ubal raha hai?”
Deenu ne aage badhkar dhakkan hataya to cheekh markar peeche hat gaya aur that-thar kanpne laga.
“Kya hua?” Iqbal ne poocha.
“Kha.......kha.........khopdi......”
Sabne pass pahuchkar dekha to unki reedh ki haddi me thandi lahar daud gayi. Pateele me bhare paani me billi ka kata sir ubal raha tha.
Phir sab naak par rumal rakhkar bahar ki taraf bhage.
Baki ki raat koi bhi theek se so nahi saka.
|
|